மும்பை: பாலிவுட் நடிகர் ஷாருக்கான் தான் நடிக்கும் சென்னை எக்ஸ்பிரஸ் படத்திற்காக நம்ம விஜய் ரேஞ்சுக்கு வேட்டி கட்டி, கூலிங் கிளாஸ் போட்டு, கண்ணைப் பறிக்கும் மஞ்சள் கலரில் சட்டை அணிந்து ஒரு போஸ் கொடுத்துள்ளார்.

பாலிவுட் இயக்குனர் ரோஹித் ஷெட்டி இயக்கத்தில் ஷாருக்கான், தீபிகா படுகோனே நடிக்கும் படம் சென்னை எக்ஸ்பிரஸ். இிதில் தீபிகா தமிழ் பெண்ணாக வருகிறார். அவருக்கு தந்தையாக சத்யராஜும், அத்தையாக மனோரமாவும் நடிக்கின்றனர். ரயில் பயணத்தின்போது தீபிகாவை சந்திக்கும் ஷாருக் அவர் மீது காதல் வயப்படுகிறார். ரயிலில் தீபிகா தமிழில் பேச, அர்த்தம் புரியாமல் பதிலுக்கு ஷாருக் இந்தியில் பேச என்று ஒரே காமெடியாக இருக்கும்படி படமாக்கியுள்ளனர்.

தமிழ்ப் பெண்ணை காதலித்தால் நம்ம ஊர் ஆடை அணிய வேண்டும் அல்லவா. இத்தனை நாட்களாக கோட், சூட்டில் வந்த ஷாருக் இந்த படத்தில் வெள்ளை வேட்டி, மஞ்சள் கலர் சட்டை, கூலிங் கிளாஸ், கையில் பெரிய பிரேஸ்லெட், கழுத்தில் கெட்டியான சங்கிலி என்று ஒரு மார்க்கமாகத் தான் வருகிறார். அவரது போட்டோவைப் பார்த்தவுடன் ஒரு வேளை அவர் விஜயை காப்பியடித்து டிரஸ் பண்ணியிருப்பாரோ என்று தோன்றுகிறது.

திருப்பாச்சி படத்தில் விஜய் அப்படிப்பட்ட கெட்டப்பில் தான் வந்து ஒரு பாட்டுக்கு ஆட்டம் போட்டிருப்பார். மேலும் அழகிய தமிழ் மகனில் மஞ்சள் கலர் சட்டையில் வந்திருப்பார். இது தவிர பல கண்ணைப் பறிக்கும் கலர் சட்டைகளிலும் விஜய் வந்துள்ளார். இந்த சிங்குச்சா சட்டையை விஜய் விடமாட்டாரா என்று நினைக்கையில் நானும் அதே கட்சி தாங்க என்று ஷாருக் வேறு.